Patan News: પાટણ જિલ્લાના હારીજમાં એક અદ્ભુત અને હૃદયસ્પર્શી ઘટનાએ સમગ્ર પંથકમાં ખુશીની લહેર પ્રસરાવી દીધી છે. હારીજની પર્વ હોસ્પિટલમાં એક મહિલાએ એકસાથે ત્રણ બાળકોને જન્મ આપ્યો છે, જેમાં એક દીકરો અને બે દીકરીઓનો સમાવેશ થાય છે. સૌથી નોંધનીય બાબત એ છે કે આ દંપતીના લગ્નના 15 વર્ષ બાદ સંતાનપ્રાપ્તિ થઈ છે, જેના કારણે પરિવારમાં આનંદનો માહોલ છવાઈ ગયો છે.
હારીજ તાલુકાના બોરતવાડા ગામની દીકરી હેતલબેન ભગવાનજી ઠાકોરના લગ્ન 15 વર્ષ પહેલાં શંખેશ્વરના પંચાસર ગામના ઠાકોર કિશનજી સાથે થયા હતા. આ લાંબા સમયગાળા દરમિયાન આ દંપતી સંતાન પ્રાપ્તિ માટે રાહ જોઈ રહ્યું હતું. અંતે હેતલબેન સગર્ભા થયા અને રવિવારના રોજ તેમને પ્રસૂતિની પીડા ઉપડતા તેમને તાત્કાલિક હારીજની પર્વ હોસ્પિટલમાં દાખલ કરવામાં આવ્યા હતા.
પ્રસૂતિ દરમિયાન હેતલબેનની તબિયત નાજુક બની હતી અને તેમને લોહીની બોટલો ચડાવવાની ફરજ પડી હતી. વધુમાં, ટ્રિપ્લેટ્સની સ્થિતિ પડકારજનક હતી; એક બાળક ઊંધું અને અન્ય બે બાળકો ત્રાંસાં હોવાથી સામાન્ય પ્રસૂતિ શક્ય નહોતી. આ જોખમી પરિસ્થિતિમાં તાત્કાલિક ઓપરેશન કરવું અનિવાર્ય બન્યું હતું.
ડૉ. પ્રિયાંશ ચૌહાણ અને તેમની નિષ્ણાત તબીબી ટીમે જટિલતાઓને ધ્યાનમાં રાખીને સમયસર અને સફળ ઓપરેશન પાર પાડ્યું હતું. આ સર્જરી દ્વારા હેતલબેને એકસાથે એક પુત્ર અને બે પુત્રીઓને જન્મ આપ્યો હતો. તબીબી પડકારો વચ્ચે ટ્રિપ્લેટ્સની આ સફળ પ્રસૂતિ ડૉક્ટરોની કુશળતાનો ઉત્તમ દાખલો છે. 15 વર્ષની લાંબી પ્રતીક્ષા બાદ ઘરમાં એકસાથે ત્રણ સંતાનોનું આગમન થતાં ઠાકોર પરિવારમાં ખુશીનો ઉન્માદ છવાઈ ગયો છે. આ અદ્ભુત પ્રસંગે સમગ્ર પંથકના લોકો હેતલબેન અને ઠાકોર પરિવારને શુભેચ્છાઓ પાઠવી રહ્યા છે.