Vadodara: ઉત્તરાયણના પર્વને હજી બે માસ જેટલો સમય બાકી છે, ત્યારે પ્રતિબંધિત ચાઈનીઝ દોરીએ ગુજરાતમાં પોતાનો પ્રાણઘાતક કહેર શરૂ કરી દીધો છે. બોડેલી-ડભોઈ માર્ગ પર એક યુવાનનું ગળું કપાઈ જવાથી કરુણ મોત નીપજ્યું છે, જ્યારે નડિયાદમાં કોલેજની એક વિદ્યાર્થિની દોરીનો ભોગ બની ગંભીર રીતે ઘાયલ થઈ છે.
નોકરી પરથી પરત ફરતા યુવાનનું મોત
બોડેલી-ડભોઈ રોડ પર થયેલા એક હૃદયદ્રાવક બનાવમાં, સંખેડા તાલુકાના વાગેથા ગામના રહેવાસી જગદીશભાઈ મનસુખભાઈ તરબદા (ઉંમર: 35)એ પોતાનો જીવ ગુમાવ્યો છે.
પ્રાપ્ત થતી માહિતી મુજબ જગદીશભાઈ, જે બોડેલીની અલ્હાદપુરા ડેરીમાં નોકરી કરતા હતા, સાંજે પોતાની બાઈક પર કામ પરથી ઘરે જઈ રહ્યા હતા. બોડેલીથી ડભોઈ તરફના વ્યસ્ત માર્ગ પર અલીપુરા ચાર રસ્તા નજીક રસ્તા પર લટકતો પતંગનો દોરો અચાનક તેમના ગળામાં ફસાઈ ગયો હતો.
ચાઈનીઝ દોરાની કાટા જેવી ધારને કારણે તેમના ગળામાં ઊંડો અને ગંભીર ઘા પડ્યો. ભારે રક્તસ્રાવ થતાં તેઓ બાઈક પરથી પડી ગયા હતા. તેમને તાત્કાલિક નજીકની ખાનગી હોસ્પિટલમાં ખસેડાયા હતા, પરંતુ સ્થિતિ નાજુક જણાતા વડોદરાની સયાજી હોસ્પિટલમાં રિફર કરવામાં આવ્યા, જ્યાં સારવાર દરમિયાન તેમનું દુર્ભાગ્યે મોત નીપજ્યું હતું.
ઘટનાના પગલે સમગ્ર બોડેલી અને સંખેડા વિસ્તારમાં શોક અને તંત્ર સામે પ્રચંડ રોષ વ્યાપી ગયો છે. સ્થાનિકોએ તાત્કાલિક અસરથી ચાઈનીઝ દોરીના વેચાણ અને વપરાશ પર કડક કાર્યવાહી કરવાની માંગ કરી છે.
નડિયાદ: કોલેજ વિદ્યાર્થિનીનું ગળું કપાયું, સમયસર સારવારથી બચ્યો જીવ
નડિયાદ શહેરમાં પણ ચાઈનીઝ દોરીનો કહેર જોવા મળ્યો છે. અહીં કોલેજની પ્રથમ વર્ષની વિદ્યાર્થિની મનીષા મારવાડી ગંભીર રીતે ઘાયલ થઈ હતી.
નડિયાદ શહેરના વૈશાલી સિનેમા રોડથી માનવ સેવા પરિવાર ટી પોઈન્ટ વિસ્તાર પાસે મનીષા તેની મિત્ર સાથે ટુ-વ્હીલર પર જઈ રહી હતી. અચાનક ગળામાં ચાઈનીઝ દોરી ફસાઈ જતા તે ઘાયલ થઈ અને ગળામાંથી ભારે રક્તસ્રાવ શરૂ થયો.
ઘટના સમયે સાથે રહેલી મિત્રએ તાત્કાલિક સમજદારી બતાવી યુવતીને નડિયાદ સિવિલ હોસ્પિટલ ખસેડી હતી. ડોક્ટરોની ઝડપી સારવારને કારણે મનીષાનો જીવ બચી ગયો, પરંતુ ગળાના ભાગે ઊંડો ઘા પડ્યો છે.
ઈજાગ્રસ્ત યુવતીના પિતાએ તંત્ર પર આક્રોશ વ્યક્ત કર્યો છે અને પ્રતિબંધિત દોરી વેચનારાઓ સામે કડકમાં કડક પગલા લેવાની માંગ કરી છે. ઉલ્લેખનીય છે કે, વર્ષ અગાઉ પણ આ જ દોરીના કારણે નડિયાદમાં એક યુવતીનું મૃત્યુ થયું હતું, જેને કારણે શહેરમાં ભયનો માહોલ સર્જાયો છે.
કડક કાર્યવાહીની માંગ
સ્થાનિક નાગરિકો અને પીડિત પરિવારોએ સ્પષ્ટ માગ કરી છે કે ઉત્તરાયણ પૂર્વે જ આવા જાનલેવા બનાવો રોકવા માટે પોલીસ અને પાલિકા તંત્ર દ્વારા ચાઈનીઝ દોરીના વેચાણકર્તાઓ અને સંગ્રહખોરો સામે સઘન ચેકિંગ અને કાયદાકીય કડક કાર્યવાહી થવી જોઈએ. આ નિર્દોષ લોકોના જીવ જોખમમાં મૂકતી દોરીને બજારમાંથી સંપૂર્ણપણે નાબૂદ કરવાની જરૂર છે.