Bhavnagar Tourist Places, Diwali Vacation 2025: શાળાઓ 06 નવેમ્બરના રોજ ફરી ખુલે તે પહેલાં, વિદ્યાર્થીઓ અને પરિવારો માટે વેકેશનના આખરી દિવસોમાં પ્રવાસન માટે ગુજરાતનું ભાવનગર શહેર એક શ્રેષ્ઠ વિકલ્પ છે. ઐતિહાસિક શાહી ધરોહર, પવિત્ર આધ્યાત્મિક કેન્દ્રો, અને અદ્ભુત કુદરતી સૌંદર્યના અનોખા સંગમ સમું ભાવનગર પ્રવાસીઓ માટેનું એક મહત્ત્વનું સ્થળ છે.
અહીંના મુખ્ય આકર્ષણોમાં 1859માં બનેલો ભવ્ય નિલમબાગ પેલેસ, વિશ્વ વિખ્યાત અલંગ શીપ બ્રેકિંગ યાર્ડ, પવિત્ર પાલીતાણાના જૈન દેરાસરો, અને શાંત ગોપનાથ બીચ જેવા સ્થળોનો સમાવેશ થાય છે. આ વિવિધતા ભાવનગરને રોયલ હિસ્ટ્રી, ઇન્ડસ્ટ્રીયલ ડેવલપમેન્ટ અને નેચરલ બ્યુટીનું ત્રિવેણી સંગમ બનાવે છે.
ભાવનગરના મુખ્ય પ્રવાસન આકર્ષણો
નિલમબાગ પેલેસ (Nilambag Palace)
ભાવનગરનો આ ભવ્ય મહેલ 1859 માં જર્મન આર્કિટેક્ટ મિ. સિમસન દ્વારા ડિઝાઇન કરવામાં આવ્યો હતો. મહારાજા સાહેબ તખ્તસિંહજીના સમયમાં નિર્મિત આ મહેલ હવે ગુજરાતની એક પ્રખ્યાત હેરિટેજ હોટલમાં રૂપાંતરિત થયો છે. આ પેલેસ શાહી, આકર્ષક સ્થાપત્ય અને આધુનિક વૈભવી સુવિધાઓનું અદ્ભુત સંમિશ્રણ છે, જ્યાં પ્રવાસીઓ રોયલ સ્ટાઇલમાં રોકાણ કરી શકે છે.
અલંગ શીપ બ્રેકિંગ યાર્ડ (Alang Ship Breaking Yard)
ભાવનગરથી આશરે 50 કિલોમીટર દૂર આવેલું અલંગ શીપ બ્રેકિંગ યાર્ડ વિશ્વના સૌથી મોટા શિપ રિસાયક્લિંગ કેન્દ્ર તરીકે જાણીતું છે. સુપરટેન્કર્સ, કન્ટેનર જહાજો અને અન્ય દરિયાઈ લાઇનરોને અહીં હજારો મજૂરોની મદદથી તોડવામાં આવે છે, જે તેને ઔદ્યોગિક પ્રવાસનનું એક અનોખું સ્થળ બનાવે છે.
તખ્તેશ્વર મંદિર (Takhteshwar Temple)
ભાવનગર શહેરની મધ્યમાં એક ટેકરી પર આવેલું આ સફેદ આરસપહાણથી બનેલું ભગવાન શંકરનું મંદિર છે. ઊંચાઈ પર સ્થિત હોવાને કારણે અહીંથી સમગ્ર શહેરનો સુંદર નજારો જોઈ શકાય છે.
પાલીતાણા જૈન દેરાસરો (Palitana Jain Temples)
ભાવનગર જિલ્લાના પાલીતાણા શહેરમાં શેત્રુંજય પર્વત ઉપર જૈન ધર્મના હજારો દેરાસરો આવેલા છે. આ શહેરને મંદિરોના શહેર તરીકે પણ ઓળખવામાં આવે છે. જૈન સમુદાય માટે શિખરજીની જેમ જ આ ખૂબ જ પવિત્ર યાત્રાધામ છે. અહીં એક વિશિષ્ટ નિયમ છે કે આ દેરાસરો ફક્ત દેવોનું જ નિવાસસ્થાન હોવાથી કોઈ પણ વ્યક્તિ (જૈન સાધુઓ સહિત) રાતવાસો કરી શકતી નથી.
તાજમહેલની પ્રતિકૃતિ સમાન ગંગા દેરી (Ganga Deri)
શહેરની મધ્યમાં ગંગાજળિયા તળાવના એક છેડે સ્થપાયેલું ગંગા દેરીનું બેનમૂન સ્થાપત્ય આકર્ષણનું કેન્દ્ર છે. ભાવનગરના ગોહિલ વંશના રાજવી પરિવારે નિર્માણ કરાવેલું આ સ્થાપત્ય તાજમહેલની પ્રતિકૃતિ સમાન હોવાથી પ્રવાસીઓના દિલ જીતી લે છે.
વિક્ટોરિયા પાર્ક અને નેચર પાર્ક (Victoria Park and Nature Park)
24 મે 1888ના રોજ મહારાજા તખ્તસિંહજી જસવંતસિંહજી દ્વારા સ્થાપિત વિક્ટોરિયા પાર્ક એક મોટો વન વિસ્તાર છે. 500 એકરમાં ફેલાયેલો આ નેચર પાર્ક વિવિધ વનસ્પતિઓ અને અસંખ્ય પક્ષીસૃષ્ટિનું ઘર છે. અહીં કૃષ્ણકુંજ તળાવમાં આવેલા ટાપુ પર બગલા, ચમચા અને જળકાગડા જેવા પક્ષીઓની માળાની વસાહત જોવા મળે છે. ચોમાસા દરમિયાન અહીંની હરિયાળી ચરમસીમાએ હોય છે.
દરિયાકિનારા અને ટાપુઓ
ગોપનાથ બીચ (Gopnath Beach)
શહેરથી દૂર આવેલો આ શાંત બીચ સફેદ રેતી અને સ્વચ્છ પાણી માટે પ્રખ્યાત છે. તે પક્ષી નિરીક્ષણ માટે પણ લોકપ્રિય છે અને ખાસ કરીને ચોમાસા (જુલાઈ-ઓગસ્ટ) દરમિયાન અહીંની સુંદરતા માણવા પ્રવાસીઓ આવે છે.
હાથબ બંગલા બીચ (Hathab Bungalow Beach)
ભાવનગર નજીક હાથબ ગામે આવેલો આ સુંદર બીચ શહેરના લોકો માટે પિકનિકનું લોકપ્રિય સ્થળ છે.
પીરમ બેટ ટાપુ (Piram Bet Island)
ઘોઘાથી 6 કિમી દૂર સ્થિત આ ટાપુ પર હોડી દ્વારા એક કલાકમાં પહોંચી શકાય છે. અહીંથી પુરાતન અવશેષો, જૂની મૂર્તિઓ અને પ્રાણીઓના અશ્મિઓ મળી આવ્યા છે, જે તેના પ્રાચીન ઈતિહાસ તરફ ઈશારો કરે છે.
ગૌરીશંકર તળાવ (Gaurishankar Lake)
આ કૃત્રિમ તળાવ ભાવનગરના દીવાન ગૌરી શંકરના નામ પરથી જાણીતું છે. તળાવના કિનારે એક પ્રાચીન શિવ મંદિર આવેલું છે. ચોમાસામાં તેની સુંદરતા વધી જાય છે અને અહીંથી સૂર્યોદય-સૂર્યાસ્તનો નજારો અદ્ભુત હોય છે.