SIR Form Online: ચૂંટણી પંચ દ્વારા હાલમાં સ્પેશિયલ ઇન્ટેન્સિવ રિવિઝન (SIR)ની કામગીરી પૂરજોશમાં ચાલી રહી છે. સામાન્ય રીતે BLO (બૂથ લેવલ ઓફિસર) ઘરે-ઘરે જઈને મતદારો પાસેથી ફોર્મ એકત્રિત કરતા હોય છે, પરંતુ હવે ટેકનોલોજીના માધ્યમથી આ પ્રક્રિયાને વધુ સરળ બનાવવામાં આવી છે. જો તમારો મોબાઈલ નંબર તમારા મતદાર ઓળખપત્ર (Voter ID) સાથે લિંક થયેલો હોય, તો તમે ઘરે બેઠા જ ઓનલાઈન ફોર્મ ભરી શકો છો.
ઘરે બેઠા ઓનલાઈન અરજીની પ્રક્રિયા
ચૂંટણી પંચે મતદારોની સુવિધા માટે ઓનલાઈન SIR ફોર્મ ભરવાનો વિકલ્પ આપ્યો છે. આ માટેની પ્રક્રિયા નીચે મુજબ છે:
- સૌ પ્રથમ ચૂંટણી પંચની સત્તાવાર વેબસાઇટ voter.eci.gov.in ની મુલાકાત લો.
- ત્યાં તમારો EPIC નંબર (મતદાર ઓળખપત્ર નંબર) દાખલ કરો.
- જો તમારું રજીસ્ટ્રેશન અગાઉ થયેલું હશે, તો તમારી વિગતો સ્ક્રીન પર આપોઆપ આવી જશે.
- નવા મતદારો અથવા જેમણે હજુ સુધી નોંધણી નથી કરાવી, તેઓ અહીં નવું ફોર્મ ભરી શકે છે.
- ઓનલાઈન ફોર્મમાં નામ, ઉંમર, લિંગ અને સરનામું જેવી વિગતોની ચકાસણી કરો અને જો કોઈ ભૂલ હોય તો સુધારો કરો.
- છેલ્લે, પાસપોર્ટ સાઈઝનો રંગીન ફોટો અપલોડ કરીને અરજી સબમિટ કરો.
અરજીનું સ્ટેટસ અને વેરિફિકેશન
એકવાર ઓનલાઈન ફોર્મ સબમિટ થઈ જાય પછી, મતદારને એક રેફરન્સ નંબર અને પહોંચ (Receipt) મળશે. આ રેફરન્સ નંબર દ્વારા અરજદાર ગમે ત્યારે પોતાના મોબાઈલ પર અરજીનું સ્ટેટસ ટ્રેક કરી શકશે.
ભલે મતદારે ઓનલાઈન ફોર્મ ભર્યું હોય, પરંતુ BLO દ્વારા ઘરે જઈને દસ્તાવેજોની ભૌતિક ચકાસણી કરવામાં આવશે. આ પ્રક્રિયાનો મુખ્ય હેતુ એ સુનિશ્ચિત કરવાનો છે કે મતદાર યાદી સંપૂર્ણપણે ક્ષતિરહિત અને અપડેટ રહે.